Lectura e familias en 5º de Infantil

 Un curso máis, as familias colaboraron estreitamente na realización de actividades relacionadas coa temática do PDI do centro. Non podemos máis que agradecer a súa implicación e participación, xa que sen a súa axuda moitas das experiencias levadas a cabo na aula non serían posibles.

 Unha das actividades realizadas a través da Mochila Viaxeira foi a elaboración de instrumentos musicais. Cada neno e nena, coa colaboración das súas familias, construíu un instrumento empregando materiais de refugallo como cartóns, tetrabricks, botes, cordóns e chapas, así como outros materiais como gomaeva, sedela, madeira ou plástico. Ademais, completaron unha ficha na que indicaban o nome do instrumento, o seu país de orixe e a familia instrumental á que pertence.

 Os instrumentos elaborados convertéronse en auténticas obras de arte. Ao chegar á aula, cada neno e nena explicou o proceso de elaboración do seu instrumento, presentou os familiares que colaboraran na súa creación e compartiu información sobre a súa procedencia e clasificación. Finalmente, todos tiveron a oportunidade de facelos soar e organizouse unha exposición no corredor do edificio de Educación Infantil. Nela puidéronse contemplar instrumentos tan variados como unha pandeireta, un tambor, unha guitarra, unha trompeta, un saxofón, un violín, un xilófono, unhas maracas, un piano, unha arpa, unha frauta doce e un acordeón.

Tamén tivemron a sorte de recibir a visita de Alba, irmá de Mariña e alumna do centro. Alba achegouse á aula coa súa pandeireta e unhas cunchas, interpretando varias pezas musicais e cancións para todo o alumnado. Estivo acompañada por Mariña, que tocou a pandeireta elaborada xunto á súa avoa na actividade da Mochila Viaxeira. Foi unha experiencia moi enriquecedora, na que Alba explicou como colocar correctamente as mans para tocar este instrumento. Os máis atrevidos incluso se animaron a probalo.

 Outra visita moi especial foi a de Ricardina, tía de Daniel, quen nos achegou ao mundo da trompeta. Explicou aspectos básicos relacionados coa respiración e a técnica necesaria para tocar este instrumento. Ademais, Daniel puido interpretar algunhas notas coa trompeta que elaborara coa súa familia pola Mochila Viaxeira.

 Os aniversarios tamén estiveron moi vinculados ao proxecto musical desenvolvido ao longo do curso. Durante estas celebracións, os nenos e nenas cantaron e bailaron as súas cancións favoritas, colorearon instrumentos musicais, realizaron crebacabezas, escribiron nomes de instrumentos, fixeron pulseiras musicais e gozaron especialmente co xogo do “Chan que baila”.

 Aroa celebrou o seu aniversario interpretando a canción As rodas do autobús, primeiro ela soa e despois acompañada pola súa familia e os seus compañeiros e compañeiras. Ademais, realizaron unha actividade de coloreado de animais decorados con notas musicais.

 Danna cantou a canción Vuelan mariposas, primeiro en solitario e posteriormente coa colaboración da súa familia e do resto da clase.

 Icía e Mateo escolleron a canción As vogais, que interpretaron primeiro individualmente e logo acompañados polas súas familias e compañeiros.

 Pola súa banda, Sofía celebrou o seu aniversario cantando Himno de mi peña. Ademais, participou xunto aos seus compañeiros e compañeiras na montaxe dun crebacabezas dunha orquestra.

 Cloe e Iván elixiron a canción De ellos aprendí, coa mensaxe tan fermosa que transmite.

 Lía elixiu a canción Realidad, coa que familia e alumnos cantaron e bailaron. Neste aniversario gozaron moito co xogo “Chan que baila”. Consiste en tirar o dado e en función do instrumento que saia os nenos teñen que colocarse no instrumento que se indica nas láminas colocadas no chan feitas en gomaeva coa silueta dos instrumentos. Se o dado cae en interrogación tiñan que seguir a consigna dada como por exemplo, facer o son da guitarra.

Con motivo do Samaín, as familias volveron demostrar a súa creatividade transformando cabazas en auténticas obras de arte inspiradas na música: a casa de Mozart, diferentes personaxes musicais e diversos instrumentos cobraron vida grazas á súa imaxinación

 Unha mostra máis da implicación, creatividade e entusiasmo que caracterizou a súa participación ao longo de todo o curso.

 Tamén nos visitou Eduarda Fernanda, a nai de Lorena, que no Proxecto Viaxe Musical polo Mundo nos fixo un vídeo coa IA para ensinarnos os aspectos máis relevantes de Brasil, cultura, comida, monumentos, bailes…

 E como non podía ser doutra maneira ensinounos a bailar a samba. Foi moi divertido aprender algún dos  pasos deste baile típico de Brasil.

 Patricia, nai de Danna tamén axudou no proxecto de Viaxe Musical polo Mundo visitándoos en dúas ocasión. Na primeira trouxo o seu mapa do mundo e foilles contando cousas de cada continente. Logo cada neno/a elixiu o país que lle chamou a atención para colocalo no mapa e que Patricia lles contara del.

 Xa na segunda ocasión viñeron co mapa de Australia que elaboraron no que Danna coa axuda de súa nai foi pegando no mapa as adhesivos que elas mesmas fixeron nas diferentes zonas nas que se divide. Sen lugar a dúbidas un dos momentos máis divertidos foi colocar onde vive Bluey e tamén os animais, como o koala, o canguro.... Logo cada neno/a colocou no seu mapa de Australia as adhesivos con todo o aprendido con Danna e Patricia.

 Icía elaborou un mural sobre a vida e a cultura en Xapón e a súa bandeira coa axuda da súa familia que logo trouxo á aula.

 Elia, coa súa nai elaborou os nomes en xaponés de toda a aula. Logo tróuxoos á clase xunto cun debuxo para colorear.

 Sofía cos seus pais fixo un sistema solar que trouxo á aula e que nos explicou. Estivo no recuncho do universo durante todo o curso.

 Queremos agradecer enormemente a todas as familias a implicación na vida da aula durante todo o curso!